Pages

2011/11/28

Гарчиг алга

(Фельетон)

Сургуулиа төгссөнөөс хойш амьдрал үнэндээ гунигтай байна. Өнгөрсөн хавар эцэг эх хоёр тувт үглээд амар заяа үзүүлдэггүй шүү. Өдий 23, 4 хүрчихээд гандангын тагтаа шиг эцэг эхээрээ тэжээлгэлээ гэж. Тэгээд хэсэг нөхөдтэйгөө газар тариалангын бизнес эрхэлхээр шийдэж, дээгүүр доогуур танил талаараа хөөцөлдүүлээд Сэлэнгэд 10 га газар авчихлаа. Байцаа төмсийг битүү суулгаж, зун нь зэрлэг зулгаасныг эс тооцвол нар хур тэгширээд сайхан л байсан.  Нэг мэдэхнээ намар болчихов. Ажил хийх хүн олдохгүй зовоогоод 10 га газрыг гурвуулаа өдөр шөнөгүй зулгаалаа. Ингэж тэгсээр байтал өвөл. Ургуулснаа хурааж дийлэлгүй хөлдөөж, жинхэнэ утгаараа шатав. “Ерөөсөө энэ бүхэн 76-н мангуугаас боллоо. Бүгдээрээ иргэний хөдөлгөөн байгуулъя” хэмээн эрхээ зөрчүүлсэн нэг нөхөр минь хэлэв.
Гэв гэнэт хаанаас ч юм нэг эрхэм гарч ирээд: “Сайн байцгаана уу? Эзэн Чингисийн үр сад, хөх толбот ногоочдоо. Би бээр та бүгдийн эрх ашиг хөндөгдсөн гэж сонссоод сэтгэлийнхээ дуудлагаар энд ирлээ. Ясли цэцэрлэг сургууль гээд л ер нь бүх шатанд тувт дарга хийж байсан арвин их туршлагатай тайж гаралтай тэнгэр язгууртай хүн. Бүгдээрээ нийлээд ЗГ-ын ордны цонхыг хөлдсөн төмс байцаагаараа хага цохъё!  Хөлдсөн ногооны хувьсгал хийе!” хэмээн хоолой зангируулан омогшив. Эрхээ зөрчүүлсэн мань мэт нь өөрийн эрхгүй л УУХАЙ!!! УУХАЙ!!! хэмээн дуун түрлэг өргөж төмсөө хөлдөөлгөсөн иргэдийн хөдөлгөөнөө байгуулсан билээ. Хараад байхад үе үе ард иргэдээ өмгөөлсөн, эрх ашгийг минь хамгаалсан сайхан “эх оронч” залуус гарч ирэх юм. Уг нь маш сайн хэрэг ч одоо үед үнэ цэнээ алдчихсан юм байна лээ. Манай хөдөлгөөний удирдагч тэмцэлээ шантралгүй хийсээр байсан ч эцэстээ Н.Энхбаярын гар хөл, Ц.Элбэгдоржийн бууны нохой гэгдэж, тайж гарал тэнгэр язгуур нь хятадын үр сад болон хувирсан. Ер нь энэ олон жагсаал цуглаанууд гурван жилийн өмнө болсон их үймээнээс хойш ач холбогдолгүй болсон юм шиг ээ. Би ч тухайн үед хөдөө хээр явсан болохоор ямар нэгэн ойлголтгүй явдаг юм. Миний нэг нөхрийн ярьснаар бол их муухай юм болсон гэсэн. Бүтэн өдрийн турш бичиг цаасанд дарагдан оффисдоо ганцаар суусан манай найз, нар шингэх алдад үүрэгт ажлаа дуусгаж л дээ. Өнгөрөгч баасан гаригт доргиж явахдаа нэгэн бүсгүйтэй танилцаж энэ өдрийн орой дахин уулзахаар болзож. Ажлаасаа гармагч үл таних гурван жаал нэгж бүр нь 100 гаруй долларын үнэтэй Ром дарсыг 5000₮-өөр худалдаж авахыг санал болгов. Болзоог улаан дарс уруулын амтгүйгээр төсөөлөхийн аргагүй учир өөртөө хоёрыг өрөөлд нэгийг худалдан авч Энхтайваны гүүрэн дээр уулзмагцаа “Дюти фрий”-гээс дарс авснаа гээд л элдэв шалдав зүйл ярилцан алхах зуур, дин дон дуутай, дээрээ улаан гэрэлтэй, цэнхэр алаг зүсмийн машин ирээд үгийн зөрүүгүй манай хүнийг чихэн одох нь тэр. Хаа ч юм бүү мэд нэгэн жихүүдэс хүргэм гэзэр авчираад олон тооны согтуучуудын араас дугаарлуулав. Түүний урд цам бүжгийн цагаан өвгөний хувцас багтай морин хуур ёочир барьсан этгээд найган зогсоно. Төд удалгүй араас нь дундаа шамшийсан сэйф дамнаж, нөгөө гартаа лантуу жоотуу атгасан хос залуу,  авдар “жонни уолкер” виски сугавчилсан өвөө, “эйсэр” брэндийн процессор тэвэрсэн охин зэрэг өөр өөрийн онцлогтой хүмүүс цувж гарлаа. Мань хүн УИХ-ын сонгуулийн үр дүнг эсэргүүцсэн 7-дугаар сарын 1-ны хэрэгт орооцолдсоноо сая л мэдэв. Ийнхүү гурван лонх дарсны хэргээр гүтгэгдэж, гурван жил ургуулсан Чан Ву стилийн үсээ хусуулж, гурван сар хоригдсон гэсэн. Их үймээнээс болж миний нөхөр ганцаар хохироод үлдсэн гэвэл хол оо хэвтэнэ. Улс төрийн томоохон нам, урлагын байгууллагууд аж ахуй нэгж хувь хүн гээд л нэлээдгүй урт жагсаалт бий. Хэтэрхий “амжилттай” болсон жагсаалын “ачаар” “хожигсод” нь шоронд хадагдаж, хохирогсод нь гэмтэлийн эмнэлэгт хүргэгдсэн. Эрүүгийн сэргийлэгчийн аманд салаавч чихэж байгаад эрхий мэргэнээ тас хазуулсан жаал, эмзэг эрхтэн рүү гээ резинэн сумтай буугаар буудуулсан залуу, эмээ шиг ээ хүнд тархиа зад цохиулсан цагдаа гээд л хохирогсодын тоо хэдэн зууд хүрч байв. Энэ бүгдээс хамгийн эмгэнэлтэй нь таван хүний амь эрсэдсэн явдал юм. Их гай зовлонгын эзэн холбогдогч нь эрхэм 76 бол биш, эх оронч залуу гэвэл үгүй, явж явж  сонгууль хэмээх хадны хар мангаа болж таарсан. Байшин шатаан хулгай хийж, гудамжаар явсан хүнийг хөнөөсөн. Гарт баригдахгүй янзын туучий учир ял тулгаж болохгүй. Тиймээс өдийг хүртэл хэргийн эзэн олдоогүй явж байна. Энэ сонгууль гээчийг би сайн мэдэхгүй ээ. Мөнгө төгрөг тараадаг л гэнэ. Гурил будаа өгдөг гэсэн. Өдий наслахдаа хоёр сонгуульд оролцсон ч хамгийн дээд тал нь нийтлэлч Б.Баабарын “Ардын элч” гэх ном, дэвшигчийн нэртэй будаатай аяга, гал ноцоох сонин л авч байлаа. Тэгэхээр нарийн ширийн булхай бузарыг бол би мэдэхгүй. Харин оюутан байхад их сургуулийн зөвлөлийн дарга сонгох сонгууль аатай болдог байж билээ. Оюутан байхдаа би ангийн дарга байсан юм. Сонгууль болохын өмнөх өдрүүдэд санал худалдаж авах ажил эрчимтэй өрнөнө. Таарах болгондоо харц булаах нүдний гэм болсон охин над дээр ирж яриа өдлөө.
-Сайна уу? Сайн!!!
-Дугаараа өгчих. 9913........
-Бака орой мессеж бичье.
Орой нь мессэж ирлээ. “Би чамайг ноднингоос хойш харж явсан. Хэрвээ чи улаан сарнай клубын тэргүүнийг энэ сонгуульд дэмжвэл хоёулаа үерхье. Хамгийн гол нь манай хүнийг сонгосон гэдгээ гар утсан дээрээ бичиж баталгаажуулаарай” гэсэн байв. Харин маргааш нь цэнхэр гурвалжин клубын гишүүн намайг хоолонд урьлаа. “Өнөөдөр болох сонгуулиар манай клубыг дэмжвэл шинэ жилээр сургуулийн шилдэг оюутан цол тэмдэг болон цэнхэр гурвалжин клубын хэвлэл мэдээллийн албанд даргаар авъя” гэв. Үүнээс хойш ногоон оюутны зориг эвсэл, бас бус бие даан дэвшигчид архи пивоор дайлан мөрийн хөтөлбөрөө танилцууллаа. Орой ч боллоо, 165 тоот хурлын танхимд нийгмийн ухааны сургуулийн ангийн дарга нар бүгд цугларав. Танхимын баруун хойд хэсэгт архелогийн ангийн залуус, доод курсын ангийн дарга нарыг харцаараа рекитлэн сууна. Харцанд нь орохгүй бол сургуулийн урд  микро автобустай хүрзээр зэвсэглэсэн хэсэг нөхөд нь далан давхар луу явахад бэлэн байгаа. Энэ үелзэлд мисс найз охин уу? Сургуулийн шилдэг оюутан уу? гэсэн хоёр сонголт толгойд эргэлдэнэ. Сонгууль урдын уламжлал дагуу хэрүүл маргаан камерын бичлэг дор явагдаж саналаа өгөх эрхтэй хүмүүс нэг нэгээрээ дэмжигчийнхээ нэрийг тусгайлан тамгалсан цаасан дээр бичиж эхлэв. Миний ээлж ирэн өнөөх хоёр бодол эргэлдсээр л. Бодож бодож бие даан нэр дэвшигчийн нэрийг бөглөөд өгчихлөө. Мисс найз охин сонгох гэхээр гар утас маань камергүй Нокиа 3310. Сургуулийн шилдэг гэхээр угаасаа би тэр шагналыг хувийн амжилтаараа авах нь тодорхой байсан юм. Ийнхүү сонгуулийн дүн гарч бие даан нэр дэвшигч ялав. Алд цэнхэр хадган дээр мөнгөн аягатай сүү тамга тэмдэгтэй нь цуг гардуулав. Шинээр сонгогдсон дарга болбоос ирээдүйн эх орончын залгамж халаа билээ.

10 comments:

Anonymous said...

Hehe goy bichleg bna..

Anonymous said...

Heheh unshihad sonirholtoi bailaa. Amjilt husiii

Anonymous said...

Goog job

Anonymous said...

Saihan bichjee

Бэсүд Бяруузана Пүрэвдагва said...

хахахах төгсгөл нь бүр сайхан

... said...

hehe, zunii 3 sariin amidral maani haragdchlaa bna

П.Батхуяг said...

Эцсийн эцэст авьяас л үлдэнэ дээ. Ялгардагын чи бас ялгараарай. Сайн дүү нарын минь нэг Сайнжаргалын Начин чамд итгэдэг гэж нэгэн өдөр тамхилж зогсохдоо ихэд хичээнгүйлэн захисансан.

Сангидоржийн Батхуяг said...

Таны талаар ч бас их сонссон баярлалаа.. Ойлголоо :-)

okidoki said...

uneheer goy bichjee heleh ug alga

Anonymous said...

uneheer goy bichjee heleh ug alga